ჩოხატაურის ყოვლადწმიდა ღვთისმშობლის სახელობის სამრევლო სკოლაში ხორციელდება პროექტი თემაზე „ქიმია აჭუჭყიანებს ბუნებას, ქიმია ასუფთავებს მას“. ხელმძღვანელი ქიმიის პედაგოგი ლონდა ლომაძე.
პროექტის ფარგლებში X კლასის მოსწავლეები იმყოფებოდნენ აჭარაში, ფიტოპათოლოგიისა და ბიომრავალფეროვნების ინსტიტუტში, სადაც ისინი გაეცნენ სასოფლო-სამეურნეო კულტურების გავრცელებულ დაავადებებს, ამ დაავადებათა მკურნალობის ქიმიურ მეთოდებს, დაათვალიერეს მოლეკულური ბიოლოგიის ლაბორატორია. მიკოლოგიის განყოფილებაში მოამზადეს მცენარეთა დაავადებების გამომწვევი სოკოების პრეპარატები და დაათვალიერეს მიკროსკოპში. აქვე მოინახულეს საკოლექციო-საცდელი ნაკვეთი.
სოფლის მეურნეობის სამინისტროს კვლევით ცენტრში, მოსწავლეები გაეცნენ წყალში პესტიციდების და მიწისთხილში აფლატოქსინების შემცველობის განსაზღვრის მეთოდებს.
ჩამდინარე წყლების გამწმენდ სადგურში მოსწავლეებმა დიდი ინტერესით დაათვალიერეს ჩამდინარე წყლების დასუფთავების დანადგარ-მოწყობილობები.
ბათუმის შოთა რუსთაველის სახელმწიფო უნივერსიტეტის ქიმიის დეპარტამენტში, დასავლეთ საქართველოს რეგიონალური ქრომატოგრაფიის ცენტრის ხელმძღვანელმა ალეკო კალანდიამ მოსწავლეებს კვლევის ახალი მეთოდები გააცნო და ესაუბრა ქიმიის მნიშვნელობასა და პრესპექტივებზე მომავლის საქართველოში. სტუდენტებთან ერთად ჩატარდა სახალისო ცდები.
ჩოხატაურის სამრევლო სკოლა მადლობას უხდის ბათუმის შოთა რუსთაველის სახელობის სახელმწიფო უნივერსიტეტის რექტორს ბატონ მერაბ ხალვაშს, საქართველოს სოფლის მეურნეობის სამინისტროს კვლევითი ცენტრის დირექტორს ბატონ გურამ მემარნეს, უჯრედული ტექნოლოგიის ლაბორატორიის ხელმძღვანელს ქალბატონ ნანა ზარნაძეს, ასევე თითოეულ სამეცნიერო და აკადემიურ პერსონალს გაწეული დახმარებისთვის და კიდევ ერთი საინტერესო დღისთვის.